Өңірлік комиссияның құрамында былтыр 6 жұмыс тобы 11 бағыт бойынша жұмыс істеген, деп хабарлайды inbusiness.kz облыстық ақпарат және қоғамдық даму басқармасына сілтеме жасап.
Қазіргі уақытта 3 жұмыс тобы жұмыс істейді. Жұмыс тобында 17 адам бар.
"Комиссия өткен ғасырдың 20-50 жылдарындағы қуғын-сүргін құрбандарын құқықтық және саяси ақтау үшін архив материалдарын, тарихи дереккөздер мен құжаттарды зерттеу бойынша дәйекті жұмыс жүргізуде", - деді облыстық ақпарат және қоғамдық даму басқармасында.
Басқарманың мәлімдеуінше, жұмыс топтарының мүшелері жүргізген зерттеулер нәтижесінде Павлодар облысының мұрағаттарында 449 қор, 2907 іс, 4002 ақталмаған азамат анықталды.
"Биыл қыркүйек айында Павлодар облысының прокуратурасына қарау үшін хат және 460 ақталмаған саяси қуғын-сүргін құрбандарының тізімі жіберілді. Бұл бағыт бойынша жұмыс жалғасады", - деді басқарма өкілдері.
Павлодар облысы бойынша 51 жаппай жерлеу орындары анықталды. Білім беру басқармасының "Ақпараттық технологиялар колледжінің" техникалық қолдауымен Саяси қуғын-сүргін және аштық құрбандарының жерлеу орындарының интерактивті картасын құрастыру бойынша жұмыс басталды.
Өлкетанушылармен кездесуде өлкенің қариялары ХХ ғасырдың 20-30-жылдарында қуғын-сүргінге ұшырап, 30-50-жылдары жер аударылғандардың ұрпақтарының естеліктерін тыңдап, қағазға түсірді.
"Комиссия жұмысының нәтижесінде анықталған материалдардан томдар, монография жарық көрді. 2022 жылы БАҚ-та комиссияның қызметі туралы 43 мақала жарияланды", - деді облыстық ақпарат және қоғамдық даму басқармасы.
2023 жылы екінші жұмыс тобының бағыттары бойынша саяси қуғын-сүргін құрбандары туралы дербес мәліметтерге баса назар аудара отырып, мұрағаттық құжаттар мен материалдар жинағын шығару жоспарланып отыр.
