Жыл басынан бері ел көлемінде азық-түліктің барлық дерлік түрінің бағасы айтарлықтай өсті. Мәселен, Павлодар облысында үш айға жуық уақыт аралығында бірінші кезекте керек тауарлар 9,6%-ға қымбаттады, деп хабарлайды inbusiness.kz тілшісі.
Тек соңғы бір аптаның өзінде өңірдегі өнімдер бағасы 7,1%-ға өсті. Бұл көрсеткіш бойынша Павлодар облысы "үздік үштіктің" қатарында тұр. Батыс Қазақстан облысында азық-түлік 9,5%ға, Ақтөбеде 8,7%-ға өсті.
Үкімет басшысы Әлихан Смайылов облыс әкімдеріне ескерту жасап, мәселені тез арада бақылауға алуды тапсырды.
Соның аясында Павлодар облысында жұмыртқа өндіретін екі фабрика – "Павлодар Құс" пен "Шарбақты Құс" кәсіпорында тексеру жұмыстары басталды. Мұнда бағаны келісім арқылы көтеру фактісі бар-жоғы сараланады.
Айта кетейік, бүгінгі таңда облыстағы сауда орындарындағы жұмыртқа бағасы орта есеппен 30-40 теңгеге қымбаттады. Бұған дейін бірінші санаттағы ондықтың бағасы 370-380 теңге аралығында болса, қазір 400 теңгеден асып жығылады.
Құс шаруашылықтары басшылары мұны доллар бағамының күрт өсуімен байланыстырады. Себебі тауықтарға берілетін жем-азықтан бастап жұмыртқалар салынатын қағаз қораптарға дейін сырттан шетелдік валютамен сатып алынады.
Ажар Дәулетова
