Елімізде көлік құралдарының иелері әр техникасы үшін жыл сайын мемлекетке міндетті төлем жасауы тиіс екені белгілі. Алайда темір тұлпарлардың кейбір иелері аударым жасауға асығар емес, деп хабарлайды inbusiness.kz тілшісі.
Азаматтар 1 сәуірге дейін 2023 жыл үшін көлік салығын төлеуі тиіс. Алайды былтырғы түгілі 2022 жылдың салығын өтемегендер әлі де бар. Павлодар облыстық мемлекеттік кірістер департаментінің мәліметінше, бүгінде 9 мың тұрғын төлемді жасаудан жалтарып жүр.
"Өңір бойынша 9 мың павлодарлықтың 650 млн теңге көлемінде көлік салығы бойынша қарызы бар. Сонымен қатар, қазір 2023 жылғы көлік құралдарына салынатын салықтың есептелген сомалары бойынша Puch-хабарламалар Kaspi және Halyk банктерінің мобильді қосымшаларын пайдаланушыларға жіберілді. Олар сол мобильді қосымша арқылы бірден төлем жасай алады", - деп хабарлайды сала мамандары.
Тұрғындар көлікті пайдаланғаны үшін 1 сәуірге дейін тиісті төлем жасамаса, әр күн үшін өсімпұл есептелетінін ескеру керек.
Жалпы, ресми дерек бойынша, Павлодар облысында 130 мыңнан астам тұрғынның атында барлығы 190 мыңға жуық көлік бар.
