СҚО-да су тасқынының үшінші толқыны жүріп жатыр. Сергеев қоймасындағы су ернеуінен 215 см-ге асқан. Петропавлда да су деңгейі сағат сайын өзгеруде, деп хабарлайды inbusiness.kz сайты Qazaqstan Media-ға сілтеме жасап.
"Қазгидромет" мамандары әрбір төрт сағат сайын мониторинг жүргізуде.
"Өңірдегі басты гидронысан Сергеев су қоймасында су деңгейі бір тәулік ішінде 96 см-ге көтеріліп, су ернеуінен 215 см-ге асқан. Петропавл су торабында да жағдай сағат сайын өзгеріп жатыр. Мұнда қауіпті меже - 960 см. Бірақ, су деңгейі қазірдің өзінде 1058 см-ді көрсеткен", - делінген хабарламада.
Ал мамандар су тасқынының үшінші толқыны облыс орталығына тек алдағы демалыс күндері келеді деп болжап отыр. Яғни, сол кезде Заречный кентін су басу қаупі бар. Сондай-ақ Ғабит Мүсірепов ауданы, Шөптікөл ауылы маңында Есіл өзенінің деңгейі 228 см-ге көтерілген.
Есіл ауданы Покровка ауылының маңында да жағдай мәз емес. Мұнда су арнасынан асып, жайылмаға шығып кеткен.
