Нұрлан Жақыпов инвестициялық жобалардың белгіленген мерзімде іске асырылуын талап етті, деп жазады inbusiness.kz сайты.
"Самұрық-Қазына" АҚ Басқарма төрағасы Нұрлан Жақыпов қордың портфельдік компанияларының басшыларымен жұмыс кеңесін өткізді. Жиындағы негізгі тақырып – ірі инвестициялық жобаларды іске асыру мерзімдерін сақтау және нысандарды уақытында пайдалануға беру.
Мемлекет басшысы Қасым-Жомарт Тоқаевтың 2026 жылы 28 қазандағы Қазақстан халқына Жолдауында жарияланған міндеттерді іске асыруға ерекше назар аударылды. Президент ел инфрақұрылымын ауқымды жаңғырту, жаңа генерациялық қуаттарды дамыту және 2029 жылға қарай тұрақты энергетикалық профицитті қамтамасыз етуді тапсырды.
Қор басшысы құрылыс жұмыстарының барлық кезеңінде қатаң бақылауды қамтамасыз етуді және белгіленген мерзімдерді сақтау үшін қажетті шаралар қабылдауды тапсырды.
Кеңесте Түркістан, Қызылорда, Алматы және Екібастұз қалаларындағы электр станциялары мен газ өңдеу зауыттарының құрылысы қаралды. Аталған нысандарды іске қосу мерзімдерін кейінге шегеруге болмайтыны айтылды.
"Стратегиялық инвестициялық жоба мерзімдерінің бұзылуына жол берілмейді. Әрбір бірінші басшы қабылданған міндеттемелердің орындалуына және нысандардың уақтылы пайдалануға берілуіне жеке жауап береді. Немқұрайлы қарау, тиісті бақылаудың болмауы сәйкесінше басқарушылық шешімдер қабылдауға әкеледі", – деді Нұрлан Жақыпов.
Қазіргі уақытта қордың Директорлар кеңесінің бақылауында жалпы құны 43,8 трлн теңге болатын іске асырылатын 69 ірі инвестициялық жоба бар.
