Риддердегі жылу-электр орталығын инвестор сатып алды

532

Алайда, екіжақты мәміле сомасы коммерциялық құпия ретінде сақталып отыр.  

Риддердегі жылу-электр орталығын инвестор сатып алды Фото: gov.kz

Риддердегі авариялық станцияны жылу энергетикасында үлкен тәжірибесі бар инвесторлар сатып алды, деп хабарлайды inbusiness.kz ШҚО әкімдігіне сілтеме жасап.

ШҚО әкімдігінің мәлімдеуінше, команданы ЖЭО жұмысымен жақсы таныс тәжірибелі маман Құралбек Әбдірахманов басқарады. Компания Қарағанды мен Астана қалаларында жұмыс істейді. Жаңа инвестор бірден жұмысқа кірісіп кеткен және қазір Риддер ЖЭО-да жүр.

Облыс әкімінің орынбасары Ержан Нұрбаевтың айтуынша, меншік иесі компанияларды электр энергиясын өндіретін турбиналарды жөндеуге шақырған. Көмір беру тракті әлі жөнделіп жатыр, бүгін түнде желімдеу жұмыстары аяқталады, содан кейін қосу-реттеу процесі басталады. Ертең станцияға әдеттегідей көмір беруді жоспарлап отыр.

Сондай-ақ Ержан Нұрбаев атап өткендей, инвестор Риддерде қортқы көмір өндіретін зауыт салуды жоспарлап отыр. Бұл өнім бүкіл әлемде және Қазақстанда сұранысқа ие.

"Оны өндіру кезінде қазандық агрегаттарын жағу үшін қолданылатын газ бөлінеді. Сондай-ақ, қортқы көмір өндірісінде суды жоғары температурада 95 градусқа дейін қыздырады, оны жылу желісінде қолдануға болады", - дейді ШҚО әкімінің орынбасары Ержан Нұрбаев.

Оның айтуынша, жаңа меншік иелері "Қазмырыш" кәсіпорнымен де іскерлік әріптестік қарым-қатынас орнатуға ниетті, олар металлургиялық ЖШС үшін қортқы көмір өндіруге дайын, ал артылғаны Қытайға экспортталады.

Инвестор компания барлық қажетті төлемдерді жүргізіп, керекті жабдықтарды сатып алып, істелген жұмыстардың ақысын төлей бастады. Алдағы жылыту маусымын штаттық режимде өткізу жоспарлануда. Ал, жазда Риддер ЖЭО-ға толыққанды жаңғырту жүргізіліп, зауыт құрылысы басталмақ.

"Жаңа меншік иесінің бұдан арғы жоспары айқын, оның мұндай жұмыстарды жүргізуде тәжірибесі де, бұл жайлы нақты түсінігі де бар", – деді Ержан Нұрбаев.

Айта кетейік, 24 қаңтарда Шығыс Қазақстан облысының әкімі Даниал Ахметов Риддердегі ЖЭО иесінің ауысқанын хабарлаған еді.

Telegram
БІЗДІҢ ТЕЛЕГРАМ АРНАМЫЗҒА ҚОСЫЛЫҢЫЗ Ең соңғы жаңалықтар осында
Жазылу