Биыл Бразилияның Рио-де-Жанейро қаласында өтетін әйгілі карнавалға 460 көше тобы қатысып, мерекелік шаралар бір айдан астам уақытқа созылады, деп жазады inbusiness.kz сайты.
Мұндай ауқым қаланың экономикасына елеулі серпін бермек.
Өткен жылы карнавал Рио экономикасына 5,7 млрд реал (шамамен 919 млн еуро) кіріс әкелген. Ал 2026 жылы бұл көрсеткіштің одан әрі өсетіні болжанып отыр. Бұл туралы Riotur туристік компаниясының президенті Бернардо Феллоуз қала әкімдігінде өткен баспасөз мәслихатында мәлімдеді.
Ресми мәліметке сай, көшедегі карнавалдық шерулердің өзіне 6 миллионға жуық адам қатысады. 18 қаңтар мен 22 ақпан аралығында 460 топ қала кварталдары мен басты көшелерде музыка мен биден тұратын думанды ұйымдастырады.
2026 жылға арналған шерулерге қатысу үшін жергілікті билікке 803 өтінім түскен — бұл өткен жылмен салыстырғанда 118-ге көп. Логистикалық шектеулерге байланысты 35 жаңа топты ғана қосу мүмкін болғанымен, басымдық дәстүрлі ұжымдарға берілген.
Ең көп іс-шаралар қала орталығында өтеді. Сонымен қатар туристер көп шоғырланатын Копакабана мен Ипанема аудандарын қамтитын аймақтарда да кең ауқымды бағдарламалар жоспарланған.
Карнавал бағдарламасы түрлі аудиторияны қамтиды: балалар мен отбасыларға арналған мерекелерден бастап, Cordão da Bola Preta секілді миллионнан астам адамды жинайтын дәстүрлі шерулерге, сондай-ақ Анитта ұйымдастыратын ірі "мегаблоколарға" дейін бар.
Қалалық кеңестің мәліметінше, Риоға келетін қалған 2 миллион адам 13–22 ақпан аралығында өтетін карнавал аптасында Самбадромдағы басты шерулерді тамашалау үшін жиналады.
