ҚР Ғылым және жоғары білім министрі Саясат Нұрбек халықаралық Learning Hero Award сыйлығымен марапатталды. Бұл туралы министрліктің баспасөз қызметі хабарлады, деп жазады inbusiness.kz сайты.
Learning Hero Award – Coursera платформасы тарапынан білім беру саласында жаңашылдық енгізіп, ауқымды өзгерістерге жол ашқан көшбасшыларға берілетін марапат. Ол ұлттық деңгейде цифрлық оқытуды дамытуға ерекше үлес қосқан азаматтарға табысталады.
– Қазақстан білім беруді цифрландырудың бірегей үлгісін қалыптастырып келеді. Мәселен, Coursera платформасында қазақстандық студенттер мен оқытушылар 350 мыңнан астам сертификат алды. Жүздеген курс қазақ тіліне аударылып, студенттерге қолжетімді болды. Сондай-ақ жоғары оқу орындары онлайн курстарды оқу бағдарламаларына енгізіп, үздік цифрлық ресурстарды барлық студенттер пайдалана алады, – делінген министрлік хабарламасында.
Бұл стратегиялық қадамдар Қазақстанды бүкіл әлемге цифрлық білім беру реформасын табысты жүзеге асырып жатқан ел ретінде танытты.
