Бұл көрсеткіш өткен жылдың сәйкес кезеңімен салыстырғанда 20,1 пайызға жоғары. Мәліметті Бірінші несие бюросы хабарлады, деп жазады inbusiness.kz сайты.
Операциялар көлемі теңге эквивалентінде 3,7 триллион теңгеге жеткен. Бұл өткен жылғы көрсеткіштен 28,6%-ға артық.
Негізгі өсім қолма-қол емес төлемдердің есебінен қалыптасқан – олардың үлесі барлық операциялардың 98 пайызын (196,1 млн операция) және жалпы соманың 91 пайызын (3,3 трлн теңге) құрайды.
– Қолма-қол ақша алу операциялары жалпы үрдіске сай емес. Тоғыз айдың қорытындысы бойынша мұндай операциялардың саны 8,3%-ға азайып, 3,9 млн-ға дейін түсті. Алайда олардың жалпы сомасы 1,7%-ға өсіп, 323,5 млрд теңгеге жетті. Нәтижесінде бір операцияның орташа мөлшері 83,9 мың теңге болып, жылдық өсім 11% болды, – делінген хабарламада.
Сарапшылардың айтуынша, қазақстандықтар шетелде картаны жиі онлайн төлемдер үшін пайдаланады – барлық қолма-қол емес операциялардың шамамен 70 пайызы интернет арқылы жасалады.
