Күзгі жиын-терін жұмыстарын атқару үшін ШҚО шаруаларына 25 мың тонна дизель отыны қажет. Облыстық ауыл шаруашылығы басқармасының басшысы Асқар Жақыпбаевтың айтуынша, энергетика министрлігі шілде айы үшін 7 мың тонна, тамыз, қыркүйек, қазан айлары үшін 18 мың тонна солярка бөліп отыр, деп хабарлайды altaynews.kz.
"Сұйық отынды Павлодар мұнай өндеу зауыты жөнелтуде. Тоннасының құны 180 мың теңгені құрайды. Бұл – шілде айындағы баға. Аудандар шаруаларға дизель отынын жеткізуші операторларды бекітіп алған", – деді облыс әкімдігінің кезекті мәжілісінде баяндама жасаған сала басшысы.
Көктемгі және күзгі егіс жұмыстарына қазынадан барлығы 4 миллиард теңгеден астам қаражат қарастырылған-ды, оның ішінде 2,7 миллиард теңге - тыңайтқыштар алуға, 800 миллион теңге - тұқымды жақсартуға, 168 миллион теңге суаруға арналған.
Жұмыстарды атқаруға қажет техника жеткілікті дәреже. Осы ретте атап өтерлік жайт, басқарма ауыл шаруашылығы техникасын есепке алудың бірегей жобасын қолға алған, қазіргі кезде жер-жердегі мамандар осы тың тәсілмен жұмыс істеуді меңгеруде. Қыркүйек айында аталмыш бағдарлама Қарағанды қаласында республикалық деңгейде таныстырылатын болады.
"Облыс шаруашылықтары мен элеваторларында түрлі қуаттағы 90 кептіргіш және 3151 комбайн бар, оның 869-ы заманауи үлгіде. Бір комбайнға 350 гектар егістіктен келеді, яғни жүктемелері соншалық көп те емес. Жыл басынан бері қожалықтар 315 ауылшаруашылық техникасын сатып алған, арасында 7 астық орушы комбайн да бар", – деп мәлімдеді Асқар Жақыпбаев.
ШҚО диқандары астық оруға дайын. Техника мен қоймалар қарастырылған. Тәулігіне 12 мың тонна астықты тазартып, кептіруге жетерлік қырман бар. Ал, элеваторлар мен қоймалар болса шамамен 1 миллион астықты сақтауға қауқарлы.
Жалпы облыс биыл 800 мың тонна дәнді және 500 тонна майлы дақыл жинауды жоспарлап отыр.
