Биыл ШҚО-да жол-көлік оқиғаларынан 120 адам көз жұмған, 1170 адам түрлі жарақат алған, деп хабарлайды kaz.altaynews.kz.
Облыстық полиция департаментінің басшысы, полиция генерал-майоры Жанарбек Бақтыбаевтың айтуынша, биыл өңірде 920 жол-көлік оқиғасы тіркеліпті.
"Жол апаты мен жарақат алғандар саны 9 және 11 пайызға төмендесе, өкінішке қарай жол апаты салдарынан қаза тапқандар саны 13%-ға артқан. Биылғы он айда жол қауіпсіздігі бойынша 195 мың бұзушылық анықталып, оның ішінде жылдамдықты арттырған 33 мың жүргізуші анықталды. 2700 мас жүргізуші ұсталды. Жол қозғалысы ережесін өрескел бұзған 4 мың адам жүргізуші куәлігінен айырылды", – деді Жанарбек Бақтыбаев.
Атап өтсек, есепті кезеңде 270 мың әкімшілік құқықбұзушылық анықталып, айыппұлдар бойынша облыс бюджетіне 1 млрд 300 млн теңге қаржы түскен.
Сондықтан облыстың полицейлері қазіргідей көктайғақты, қарлы-боранды құбылмалы ауа райы жағдайында жол үстінде барынша абай болуға шақырады.
