Ерлан Сайыров пен Мархабат Жайымбетов Мәжіліс отырысында осындай ұсыныс айтқан, деп хабарлайды inbusiness.kz сайты.
Сайыровтың сөзінше, Қазақстан соңғы 5 жылда сайлау процестерін дамытуда керемет нәтижелерге қол жеткізген. Тіпті, еліміздегі барлық ауыл әкімі сайланып үлгерген. Солай бола тұра, сайлау жүйесін одан әрі жетілдіру қажет екенін жеткізді. Әлбетте, оған олардың мәртебесін арттыру, өкілеттіктерін кеңейту және өз бюджеттерін қалыптастыру мүмкіндігін беру артық етпейді.
– Қолданыстағы заңнама аясында ауыл әкімдерінің өкілеттіктерін одан әрі кеңейту қажет. Біз заңнамалық деңгейде төртінші деңгейлі бюджетті қалыптастыру тетіктерін жетілдіруіміз керек. Бұл – маңызды бастама, – деді депутат.
Халық қалаулысының дерегінше, пилоттық бағдарлама бойынша 52 аудан әкімі сайланған. Дей тұрғанымен, кейбіреулері бір жылға жетпей, қызметінен кеткен. Сонымен қатар, сайлау айтарлықтай шығындарды қажет етіп отыр. Осы жылдың өзінде 6 аудан әкімі мен 1 облыстық қала әкімін сайлауға бюджеттен шамамен 1 миллиард теңге бөлінген.
Ерлан Сайыров аудан деңгейіндегі әкімдерді сайлауды тоқтата тұруды ұсынды. Бұл орайда, оның айтуынша ең тиімдісі – аудан әкімдерін мәслихаттар (қауымдастықтар) арқылы сайлау.
Парламенттің басқа мүшелері де бұл ұсынысқа бейжай қарамайды. Мысалы, депутат Мархабат Жайымбетов аудан әкімдерін сайлау мәселесін жан-жақты зерттеу, тетіктерді жетілдіру және ауыл әкімдері корпусын құру қажеттілігіне тоқталды.
– Біз аудандық қаржыландыру мәселесін шешуіміз керек. Білім беру шығындары қазір облыстық бюджеттің мойнында, ал кірістер аудандық бюджетте қалады. Аудан әкімдерінің өкілеттігіне келсек, бірнеше маңызды заңға түзетулер енгізу қажет болады. Қазір аудан әкімдерінің өкілеттігі аз, ал жауапкершілігі көп. Білім беру, денсаулық сақтау, ветеринарлық қызметтер және жұмыспен қамту орталықтары аудан әкіміне бағынбайды. Ең бастысы, сайланған ауыл әкімдерінің тәжірибелі корпусын дамыту маңызды. Бұл саяси және ең бастысы, кәсіби кадрлар пулын құруға мүмкіндік береді. Сондықтан бұл процесті уақытша тоқтатып, барлық мәселені мұқият шешкен дұрыс, – деді ол.
