Алматыда қала әкімі Дархан Сатыбалды мен Қазақстан Республикасының Төтенше жағдайлар министрі Шыңғыс Әріновтің қатысуымен "Shymbulak" тау-шаңғы курортына іргелес таулы аумақта орналасқан әмбебап құтқару станциясы мен №15 өрт сөндіру бөлімшесі салтанатты түрде ашылды, деп жазады inbusiness.kz сайты.
Ұзақ уақыттан кейін алғаш рет таулы аумақта күрделі табиғи және климаттық жағдайға бейімделген мамандандырылған бөлімше пайдалануға берілді.
Алматы 2025 жылғы ең үздік туристік бағыттардың бірі ретінде танылып отыр. Туристік ағынның артуы, тау бағыттарының дамуы және курорттық инфрақұрылымның кеңеюі төтенше жағдайлардың алдын алу мен жедел әрекет ету жүйесін күшейтуді талап етеді.
Жаңа нысан туристік аймақтағы қауіпсіздік деңгейін едәуір арттырып, құтқару қызметтерінің жету уақытын қысқартуға мүмкіндік береді. Әмбебап құтқару станциясына арнайы дрон да берілді. Жасанды интеллектпен жабдықталған дрон автоматты түрде ұшып, аумақты шолып, іздестіру жұмыстарын жүргізе алады.
Жаңадан ашылған №15 өрт сөндіру бөлімшесі Алматының орталық бөлігін, оның ішінде Көктем-1, Көктем-2, Көктем-3, Алмагүл, Таугүл шағынаудандарын, сондай-ақ бірқатар ірі тұрғын үй кешендерін өрттен қорғауды қамтамасыз етеді.
Ғимаратта әкімшілік-тұрмыстық блок, автономды инженерлік жүйелер, қауіпсіздік және бейнебақылау жүйелері қарастырылған. Жеке құрамды даярлау және қалпына келтіру үшін кәсіби залы, воркаут-аймағы және демалыс бөлмелері бар оқу-жаттығу орталығы құрылды.
Қазіргі уақытта Алматы қаласының қауіпсіздігін өртке қарсы қызметтің 20 бөлімшесі, сондай-ақ Құтқару қызметінің, Республикалық жедел-құтқару жасағының, әскери бөлімнің, Апаттар медицинасы орталығы филиалдарының және "Қазселденқорғау" күштері қамтамасыз етіп отыр.
