Арнайы мамандандырылған ауданаралық қылмыстық істер жөніндегі сот бопсалау, заңсыз бас бостандығынан айыру, ауыр дене жарақатын салу, атыс қаруын сақтау және тасымалдау деректері бойынша 6 адамға үкім шығарды, деп жазады inbusiness.kz сайты.
Сотталушылардың арасында – 1989 жылы туған Дәуір Тәукеев те бар. Ол бұған дейін "Дикий Арманның" жақын серігі ретінде аталып, басқа бір іс бойынша 5 жарым жылға бас бостандығынан айырылған еді. Алайда бұл жолғы іс Арман Жұмагелдиевтің әрекеттерімен байланысты емес.
Сот анықтаған басты фактілер:
-
С.А. 2018-2023 жылдары жәбірленуші Ө.Н.-ға қарызға берген қаражатын қайтару үшін 43,6 млн теңгені өз бетімен өндіріп алған.
-
С.А., О.Д., А.Ғ. және Т.Е. жәбірленуші мен оның досын қонақүй мен жалдамалы пәтерлерде заңсыз ұстаған.
-
2023 жылы Тәукеев (Т.Д.) көлік сылтауымен жәбірленушіден "көрімдік" ретінде 2 млн теңге талап етіп, оның 1 млн-ын алған.
-
О.А. мен Т.Д. тапанша мен оқ-дәрілерді заңсыз сақтап, тасымалдаған.
-
2024 жылы дәмханада болған жанжал кезінде О.Д. қажетті қорғану шегінен асып, жәбірленушіге ауыр дене жарақатын салған.
Сот үкімі:
-
Т.Д. (Тәукеев) – 8 жыл бас бостандығынан айыру
-
С.А. – 4 жыл 8 ай
-
О.А. – 4 жыл
-
А.Ғ. – 1 жыл
-
О.Д. – 1 жыл шартты жаза (қылмысы қайта сараланған)
-
Т.Е. – татуласуға байланысты жазадан босатылды (ҚР ҚК 68-бабы)
Бұл үкім заңды күшіне енген жоқ. Сот процесте тек нақты қылмыстық эпизодтарды қарастырды, айыпталушылардың жеке өмірі мен бұрынғы байланыстары іс материалдарына әсер етпеген. Арман Жұмагелдиевке қатыстылық дәлелденбеді.
