Қазіргі уақытта полиэтилен өндіретін зауыт құрылысы жобасын іске асыруға 40-қа жуық қазақстандық компания тартылған, деп жазады inbusiness.kz сайты.
Қазақстандық компаниялар жобалау, жабдықтар мен материалдарды өндіру және жеткізу жұмыстарына қатысып, сондай-ақ құрылыс-монтаж жұмыстарын атқарады.
Отандық өндірушілер бірегей әрі технологиялық күрделі жабдықтарды да жеткізуде. Олардың қатарында этиленді фракциялау бағанасы, суыту бағанасы, деаэратор, трансформаторлар, электрмен жабдықтау және автоматтандыру жүйелері бар.
Соның жарқын мысалдарының бірі – "АтырауНефтеМаш" зауытында жасалған, биіктігі 101,8 метр және салмағы 1,5 мың тоннадан асатын жобадағы ең ірі этиленді фракциялау бағанасы. Қыркүйек айында жабдық Силлено құрылыс алаңында орнатылды.
Қазақстандық компаниялар бетон, қадалар, металл конструкциялар және полиэтилен құбырлары секілді негізгі құрылыс материалдары мен конструкцияларды да жеткізіп жатыр. Құрылыс-монтаж жұмыстарының едәуір бөлігін қазақстандық мердігерлер атқарады.
Кадр даярлауға да айрықша көңіл бөлінген. Жобаның EPC-мердігерлері халықаралық білім беру бағдарламаларын жүзеге асыруда. Оның аясында 4 жыл ішінде Қазақстанның техникалық жоғары оқу орындарының 400-ге жуық студенті мен түлегі Испания мен Италияда инжиниринг және жобаларды басқару бағыттары бойынша біліктілігін арттырады.
