Жаңа оқу жылы қарсаңында Солтүстік Қазақстан облысының полицейлері оқушыларды тасымалдайтын мектеп автобустарын тексеріп жатыр, деп хабарлайды inbusiness.kz сайты.
Таңертеңнен бастап қызметкерлер тасымалдаушылардың автобустарды рейс алдындағы техникалық бақылаудан өткізуін және жүргізушілердің медициналық тексеруден өтуін қадағалауда. Бұдан кейін көліктер тікелей желіде тексеріледі.
Полиция автобустардың техникалық жағдайына, қажетті құжаттарына, жолаушыларды сақтандыру полисіне және қауіпсіздік құралдарының жарамдылығына назар аударуда. Атап айтқанда, өрт сөндіргіштер мен авариялық балғалардың болуы тексеріледі.
Қазірге дейін тасымалдаушылардың бақылауды ұйымдастыруына қатысты ескерту анықталмаған.
Оқушыларды тасымалдауға ерекше назар аударылып отыр. Жыл басынан бері облыста балалардың қатысуымен 60 жол-көлік оқиғасы тіркелген.
Тексеру жұмыстары жалғасуда. Полицияның негізгі мақсаты – техникалық ақауы бар автобустардың желіге шығуына жол бермей, әр сапарда балалардың қауіпсіздігін қамтамасыз ету.
