ҚТЖ баспасөз қызметінің мәліметінше, 2026 жылғы 31 қаңтарда сағат 21:36-да Талдықорған станциясындағы "Bars Build" ЖШС-не тиесілі жеке кірме жолда №215 жалғау жолында тұрған бес тиелген цистерналы вагон тобы өздігінен жылжыған. Нәтижесінде вагондар №214 сақтандыру жолының тұйық призмасына соқтығысып, екі вагон рельстен шыққан.
"Оқиға салдарынан зардап шеккендер жоқ, жүктің ағуы тіркелмеді", – делінген хабарламада.
Қауіпсіздік шараларын қамтамасыз ету мақсатында оқиға орнына Төтенше жағдайлар департаментінің күштері жұмылдырылған. Атап айтқанда, 25 адамнан тұратын жеке құрам және 7 бірлік техника тартылды.
Сондай-ақ баспасөз қызметі 1 ақпан күні сағат 00:25-тен бастап Талдықорған – Қарабұлақ аралығы пойыз қозғалысы үшін уақытша жабылғанын хабарлады. Осыған байланысты №3604 пойызының қозғалысы кідіртілген. Қазіргі уақытта қалпына келтіру жұмыстары жүргізіліп жатыр.
"Аталған оқиға “ҚТЖ” ҰК” АҚ жауапкершілік аймағына кірмейтін жеке кірме жолда орын алды", – деп атап өтті баспасөз қызметі.
Оқиғаның себептері арнайы құрылған комиссия тарапынан анықталатын болады.
