Алматы қаласында Төтенше жағдайлар министрлігінің құтқарушылары кәмелетке толмаған туристерді эвакуациялау бойынша түнгі операция жүргізді, деп хабарлайды inbusiness.kz сайты.
Алдын ала мәлімет бойынша, 15 жастағы үш жасөспірім таулы аймаққа көтеріліп, өз бетінше төмен түсе алмай қалған. Қиын жағдайға тап болған олар құтқарушылардан көмек сұраған.
Дабыл түскеннен кейін Республикалық жедел-құтқару жасағы "Барыс" бөлімшесінің қызметкерлері Алматы қалалық ТЖД Құтқару қызметінің мамандарымен бірлесіп, оқиға орнына шұғыл аттанды. Қараңғы уақытқа қарамастан, құтқарушылар таулы жер бедерімен жүріп өтіп, жасөспірімдерге жедел жетті.
Оқиға орнына жеткен соң, жасөспірімдердің жағдайы тексеріліп, олардың медициналық көмекке мұқтаж еместігі анықталды. Құтқарушылар балалардың қауіпсіз түрде таудан түсуін қамтамасыз етті.
Эвакуация сәтті аяқталып, жасөспірімдер ата-аналарына табысталды. ТЖМ өкілдері азаматтарды таулы аймақтарға шыққанда қауіпсіздік шараларын қатаң сақтауға шақырады.
