Қазақстан бірқатар елдегі қауіпсіздік жағдайының нашарлауына байланысты шетелде орналасқан 11 дауыс беру учаскесінің жұмысын уақытша тоқтатты, деп жазады inbusiness.kz сайты.
Министрлік өкілінің айтуынша, мұндай шешім Таяу Шығыстағы әскери қақтығыстың ушығуына, сондай-ақ Украина мен Эфиопиядағы қауіпсіздік деңгейінің төмендеуіне байланысты қабылданған.
– Уақытша жабылатын учаскелер Қазақстанның дипломатиялық өкілдіктері жанында орналасқан. Олар: Иран, Израиль, Иордания, Катар, Біріккен Араб Әмірліктері, Оман, Ливан, Кувейт, Украина және Эфиопия, – деп мәлімдеді Ерлан Жетібаев.
Бұдан бөлек, Дубай қаласындағы Қазақстан консулдығы жанындағы дауыс беру учаскесі де уақытша жұмыс істемейді.
Жалпы референдум кезінде шетелде 54 елде орналасқан 71 дауыс беру учаскесі жұмыс істейтін болады. Қазақстаннан тыс жерде дауыс беруге құқылы азаматтардың жалпы саны 14 230 адамды құрап отыр.
