Энергетикалық нысандар мен электр энергиясын бөлу жүйелерін тексеру бойынша қарқынды жұмыс жүргізіліп жатыр, деп жазады inbusiness.kz сайты.
Энергетика министрлігі Атырау облысындағы кен орындарында өндірістік операцияларды қалпына келтіру бағытында айтарлықтай ілгерілеушілік бар екенін хабарлады.
Маңызды кезеңдердің бірі ретінде 26 қаңтарда Екінші буын зауытының сәтті іске қосылуын атап өтуге болады. Қазіргі уақытта зауыт жұмысы бүгін таңғы сағат 04:00-де іске қосылған Королев кен орнынан жеткізілетін шикізат есебінен қамтамасыз етіліп отыр.
Қазіргі кезде шикізат ағыны тәулігіне 2 500 тоннаны құрайды. Мамандар жүйені толық толтырып, жобалық қуатқа шығу үшін мультифазалық ағын көлемін жоспарлы түрде арттыруда.
Теңіз кен орнында қазіргі уақытта барлық күш пен техникалық ресурстар толық жұмылдырылған. Энергетикалық нысандар мен электр энергиясын бөлу жүйелерін тексеру жұмыстары қарқынды түрде жүргізілуде. Ресми ақпаратқа сәйкес, қорытынды техникалық сынақтарды өткізу үшін барлық қажетті персонал тартылған.
Қазіргі таңда энергиямен жабдықтау жүйесінің қауіпсіз іске қосылуы расталды. Теңіз кен орнын жақын арада іске қосу жоспарланып отыр. Осыған байланысты "Теңізшевройл" компаниясына өнеркәсіптік қауіпсіздік пен еңбекті қорғау (HSE) талаптарын қатаң сақтай отырып, өндірісті барынша жедел қалпына келтіру міндеті жүктелді.
Екінші буын зауытының сәтті іске қосылуына арнайы технологиялық өтпелі желі монтажының жедел аяқталуы оң әсерін тигізді. Кестедегі келесі маңызды кезең – 2 ақпан.
Осы күнге қарай компрессор мен 4 трансформаторды пайдалану арқылы Қысымды арттыру жүйелері бойынша жұмысты қайта жандандыру жоспарланған. Бұл Технологиялық желілер кешені мен Екінші буын зауытына шикізатты толық әрі тұрақты жеткізуді қамтамасыз етуге мүмкіндік береді.
Энергетика министрлігі мен "ҚазМұнайГаз" ҰК АҚ ТШО-ға техникалық шараларды үйлестіру бағытында жан-жақты қолдау көрсетіп, жағдайға сағат сайын мониторинг жүргізіп отыр.
Барлық қалпына келтіру жұмыстарын тікелей Теңіз кен орнында жедел бақылау және үйлестіру мақсатында ведомство мен ұлттық компания басшылығы нысан аумағында тұрақты түрде жұмыс істеуде.
Атап айтқанда, Энергетика вице-министрі Қайырхан Тұтқышбаев пен "ҚазМұнайГаз" ҰК АҚ ірі мұнай-газ жобалары департаментінің директоры Жандос Жылқайдаров бақылауды тікелей нысан басында жүзеге асырып отыр.
Өндірістік циклді қалпына келтіру мәселесі Энергетика министрлігі басшылығының ерекше әрі тұрақты бақылауында. "Теңізшевройл" компаниясы сенімді өндірістік қызметті қамтамасыз етуге бейілділігін сақтай отырып, барлық инфрақұрылымның дайындығы мен процестердің қауіпсіздігі расталған сайын өндіріс көлемін кезең-кезеңімен арттыратын болады.
