Ұзындығы шамамен 15 мың шақырым болатын жоба Рим мен Гонконгты байланыстырып, 12 мемлекеттің аумағын қамтиды, деп жазады inbusiness.kz сайты.
Экспедиция 2026 жылы 13 маусымда басталып, 26 шілдеге дейін жалғасады. Делегация құрамыа 38 қатысушыдан тұрады. Олардың қатарында ғалымдар, инвесторлар және тұрақты даму саласының мамандары бар. Жобаны M31 Capital компаниясының негізін қалаушы Патрик Чжун және Колумбия университетінің Тұрақты даму орталығының өкілдері Джеффри және Соня Эрлих Сакс ұйымдастырған.
Патрик Чжунның айтуынша, экспедицияның басты мақсаты – өзара құрметке негізделген әлемдік байланысты нығайту.
– Бүгінде әлем тым бөлшектеніп кетті. Біз бір нүктеден екіншісіне ұшақпен тез жетеміз де, арадағы кеңістікті, ондағы адамдар мен мәдениетті байқамаймыз. Біздің мақсатымыз – әлемді жақындастыру. Егер жеткізгіміз келетін басты ой болса, ол бейбітшілікке үндеу, – деді Патрик Чжун.
Қазақстандағы бағыт Ақтау, Маңғыстау, Бейнеу, Шымкент және Тараз арқылы өтті. Делегацияның еліміздегі сапарының соңғы нүктесі 13-14 шілде күндері Алматы қаласында өтті.
– Алматы – Ұлы Жібек жолындағы ең маңызды қалалардың бірі. Мен үшін бұл жерге келу – осы тарихи мекенді өз көзіммен көру мүмкіндігі. Біз жай ғана саяхаттап жүрген жоқпыз, адамдардың оқиғасын жинап, осы өңірдің маңызын жаңаша танып-білгіміз келеді, – деді ол.
Алматы қаласы Туризм басқармасының мәліметінше, мегаполисте делегация үшін қаланың табиғи-рекреациялық әлеуеті мен креативті экономикасын таныстыруға бағытталған арнайы бағдарлама ұйымдастырылған. Экспедиция қатысушылары Қазақстан өңірлерінің табиғаты мен мәдени дәстүрлерімен танысты. Алматыға келгенде олар "Шымбұлақ" тау курортын аралап, Алматы облысындағы бүркітшілік өнерімен танысты. Сонымен қатар "Горельник" визит орталығында және жаңа Almaty Museum of Arts музейінде болды.
Қазақстандағы кезең аяқталғаннан кейін экспедиция Қытайға бет алады. Алда олар жолдың соңғы үштен бір бөлігін жүріп өтіп, Үрімжі, Сиань, Шанхай және Шэньчжэнь арқылы соңғы межесі – Гонконгқа жетеді. Экспедиция барысында түсірілген деректі фильм, влогтар мен подкасттар әлемнің жетекші медиаплатформаларында жарияланады.
