АҚШ президенті Дональд Трамп әскерилерге заңсыз бұйрықтарды орындаудан бас тартуға шақырған үндеулерден кейін Демократиялық партияның алты мүшесіне қайтадан қатаң ескерту жасады.
"Менің бұйрықтарымды орындаудан бас тартуға шақырған сатқындар жалған жаңалықтар арналарында сұхбат беріп емес, қазір түрмеде отыруы керек", – деп жазды ол Truth Social желісінде.
Бұған дейін, бейсенбіде Трамп сенаторлар мен Өкілдер палатасы мүшелерінің әрекетін "өлім жазасына әкелетін арандатушылық мінез-құлық" деп бағалады.
Әскерде қызмет еткен немесе арнайы қызметтерде жұмыс істеген үш әйел мен үш ер адам қазіргі әскерилер мен барлау қызметкерлерін "заңсыз бұйрықтарды орындамауға" шақырған видеожолдау жариялады. Олар мысал ретінде Лос-Анджелестегі наразылықтарды күшпен тарату үшін Трамптың әскерді қолдануын келтірді. Сондай-ақ АҚШ қарулы күштерінің Латын Америкасы маңында күдікті есірткі тасымалдаушыларды өлтіру әрекеттерін сынға алды.
Демократиялық партия Трамптың қорқытуларын "мүлдем жиіркенішті" деп атап, АҚШ-та жаңа саяси зорлық-зомбылық толқынының қаупі туралы ескертті.
АҚШ Конституциясына сәйкес, мемлекетке қарсы соғыс жүргізген немесе оның жауларына көмектескен адам мемлекеттік опасыздық жасайды. Мұндай қылмыс үшін өлім жазасы, түрме жазасы немесе айыппұл қарастырылған. Қандай жаза қолданылатынын соттар анықтайды.
