Елімізде жедел респираторлық вирустық инфекциялар мен тұмаудың күрт көбеюіне байланысты 9 898 сынып қашықтан оқуға жіберілген, деп жазады inbusiness.kz сайты "Ақ Жайық" басылымына сілтеме жасап.
Денсаулық сақтау министрлігінің Санитариялық-эпидемиологиялық бақылау комитетінің мәліметінше, бұл сыныптарда 190 643 оқушы білім алады. Қашықтан оқу режиміне ел бойынша 652 мектептің жекелеген сыныптары көшкен.
Комитет өкілдері мектептердің толық жабылмағанын, тек аурушаңдық шегінен асып кеткенін, жекелеген сыныптар ғана онлайн форматқа ауыстырылатынын атап өтті. Шешімді аумақтық санитариялық дәрігерлер мен білім басқармалары бірігіп қабылдайды.
Нормативке сай, жұқпалы кезеңде сынып оқушыларының кемінде 30%-ы ауырған жағдайда ғана дистанциялық оқуға рұқсат беріледі. Бұл талап бас санитариялық дәрігерлердің қаулыларымен бекітілген.
Эпидемиологиялық маусымның статистикасы алаңдатарлықтай болып тұр. Маусым басталғалы бері Қазақстанда 2 млн-ға жуық ЖРВИ жағдайы, сондай-ақ зертханалық расталған H3N2 Гонконг тұмауының 1 200-ден астам оқиғасы тіркелді. Бұл штаммның жоғары жұқпалылығы мен ауыр өтетіндігі мектептерде алдын алу шараларын күшейтуге себеп болған.
