Қазақстанда әскери қызметшілер мен құқық қорғау, арнайы мемлекеттік және азаматтық қорғау органдары қызметкерлерінің тұрғын үй төлемдерін пайдалану мүмкіндіктері кеңейтілді, деп хабарлайды inbusiness.kz сайты.
Бұл өзгерістер 2026 жылғы 15 сәуірде күшіне енген "Күзет қызметі, тұрғын үй қатынастары және құқық қорғау қызметі мәселелері бойынша Қазақстан Республикасының кейбір заңнамалық актілеріне өзгерістер мен толықтырулар енгізу туралы" заң аясында қарастырылған. Құжатты іске асыру мақсатында Үкіметтің 2026 жылғы 30 мамырдағы қаулысымен тұрғын үймен қамтамасыз етудің жаңартылған қағидалары бекітілді.
Жаңа тәртіпке сәйкес, тұрғын үй төлемдерін тек баспана сатып алуға немесе ипотеканы өтеуге ғана емес, сонымен қатар кейіннен сатып алу құқығымен жалға алу төлемдеріне және тұрғын үй құрылысына үлестік қатысу кезінде жарна төлеуге де қолдануға болады.
Бұдан бөлек, бірқатар шектеулер алынып тасталды. Атап айтқанда, жалдау мерзіміне қатысты шектеулер жойылып, жалдау шартын міндетті мемлекеттік тіркеу талабы алынып тасталды. Сондай-ақ жақын туыстармен тұрғын үй алу немесе жалға алу кезіндегі мәмілелерге қойылған тыйым күшін жойды. Бұған қоса, тұрғын үй алаңының 90 шаршы метрге дейінгі шектеуі де алынып тасталды.
Жаңартылған ережелер әскери және құқық қорғау саласы қызметкерлерінің тұрғын үй жағдайын жақсартуға бағытталған қосымша мүмкіндіктерді кеңейтеді.
Сонымен қатар тұрғын үй төлемдерін алушылар жыл сайын 25 қаңтарға дейін өз атына және отбасы мүшелеріне тіркелген жылжымайтын мүлік туралы анықтаманы, сондай-ақ арнайы шот бойынша банктік құжаттарды тапсыруға міндетті.
