Түркістан облысының Келес ауданында жол-көлік оқиғаларының алдын алу және жол қауіпсіздігін күшейту мақсатында профилактикалық рейд өтті, деп хабарлайды inbusiness.kz сайты.
Іс-шара барысында полицейлер жол қозғалысы ережелерін бұзудың 230-ға жуық дерегін анықтап, жүргізушілерді әкімшілік жауапкершілікке тартты.
Рейд кезінде жолдағы жағдайды бақылау үшін пилотсыз ұшу аппараты қолданылды. Нәтижесінде Hyundai Sonata және Li Auto L9 көліктерінің жүргізушілеріне қатысты заң талаптарына сәйкес шаралар қабылданды. Көліктер арнайы айыптұраққа қойылып, жиналған материалдар сот қарауына жіберілді.
Полиция жүргізушілерді жол қозғалысы қағидаларын сақтауға шақырды. Ведомство қарсы бағыттағы жолаққа шығу адам өмірі мен денсаулығына қауіп төндіретінін ескертті.
