Қазақстан Республикасының Ұлттық кітапханасында Қазақстан мен Франция арасындағы мәдени-гуманитарлық байланысты нығайтуға арналған бірқатар іс-шара өтті, депхабарлайды inbusiness.kz сайты.
Іс-шара барысында көпшілікке арналған Франция кітап бұрышы ашылды. Онда Францияның тарихы мен мәдениеті туралы басылымдар, француз классиктері мен қазіргі авторлардың шығармалары, сондай-ақ қазақ және орыс тілдеріне аударылған әдебиеттер қойылған.
Жаңа кітап бұрышы оқырмандарға француз әдебиеті мен мәдениетімен жақынырақ танысуға мүмкіндік береді.
Сонымен қатар француз тарихшысы әрі зерттеушісі Мари Фавероның "Алтын Орда: дала империясы әлемді қалай өзгертті" кітабының қазақ тіліндегі нұсқасы таныстырылды. Еңбекте Алтын Орданың тарихы, оның Еуразия кеңістігіндегі орны және Орталық Азиядағы саяси-мәдени үдерістерге ықпалы баяндалады.
Бұдан бөлек, Қазақстан Республикасының Ұлттық кітапханасы мен Алматыдағы Француз альянсы мәдени ынтымақтастық туралы келісімге қол қойды.
Құжат аясында тараптар бірлескен мәдени-ағартушылық жобалар мен әдеби бастамаларды жүзеге асырып, түрлі іс-шаралар өткізуді жоспарлап отыр.
