Жамбыл облысының соты кәмелетке толмаған оқушыларға үкім шығарды, деп хабарлайды inbusiness.kz сайты.
Кәмелетке толмаған сотталушылар алдын ала сөз байласу арқылы, Байзақ ауданы Құмжота ауылындағы мектептің әжетханасында 8-сынып оқушыларын жинап, бағыну мен нұсқауларын орындауды талап етіп, ұрып-соққан.
Кеудесінің сол жақ бөлігінен алған соққылардың салдарынан бір оқушы оқиға орнында қайтыс болған.
Сот үкімімен сотталушылар кінәлі деп танылып, Л.Н.-ға 6 жыл 8 айға, Л.Л.-ға 6 жыл 8 айға, Т.-ға 1 жылға бас бостандығын шектеу жазалары тағайындалды.
Мемлекет кірісіне сот сараптамаларына жұмсалған процестік шығындар, жәбірленушілердің өтемақы қорына мәжбүрлі төлем, сондай-ақ жәбірленуші тараптың пайдасына сотталғандар Л.Н.-нің заңды өкілінен 6 млн. теңге, Л.Л.-дің заңды өкілінен 5 млн теңге моральдық зиян өндірілді.
Үкім заңды күшіне енген жоқ.
