Жалпы, Израиль тарапы соққы 40 сағатқа жуық уақыт бойы жалғасып жатқанын мәлімдеп отыр. Осы уақыт ішінде 150-ден астам нысанаға шабуыл жасалды. Кейінгі 24 сағатта соққылардың басты назары орталық Тегеран болып отыр.
Дефрин сонымен қатар Иранның батысындағы жерасты нысанына шабуыл жасалғанын хабарлады. Оның айтуынша, онда қанатты және баллистикалық зымырандар сақталып, Израильге ұшырылған.
Иран тарапынан "Тасним" агенттігі жуырда астанада және көптеген аймақта әуе қорғанысы қайта іске қосылғанын мәлімдеген. Сондай-ақ бір күнде елдің батысында және Иранның орталығындағы Ком қаласының аймағында Израильдің көптеген ұшқышсыз ұшағы атып түсірілгенін жазды.
Иран да жауап ретінде Израильге зымыран соққыларының жаңа толқынын бастады. Израильдің Төтенше жағдайлар қызметі хабарлағандай, ирандық зымыран атысынан екі адам қаза тапты – шамамен 60 жастағы әйел және 45 жастағы ер адам. Тағы 19 адам жарақат алды.
