Алматының бас санитар дәрігері вакцина салдырған қанша адам коронавирус жұқтырғанын мәлім етті, деп хабарлайды inbusiness.kz.
Оның айтуынша, Алматы Санитариялық-эпидемиологиялық бақылау департаменті биылғы жылдың сәуір айынан бастап вакцинацияның толық курсынан (42-45 күн) өткендерге мониторинг жүргізді.
"Сонымен қатар 3 239 коронавирус ауруы тіркелді. Бұл жалпы екпенің толық курсын алған 987 мыңнан астам азаматтың 0,33%-ын құрайды. Алматыда вакцинацияның толық курсын алғаннан кейін аурушаңдық бойынша жағдай: Спутник V – 0,37%, Hayat-Vax – 0,26%, Sinovac – 0,19%, QazCovid-in – 0,17%. Айта кету керек, олардың ауруларының басым көпшілігі жеңіл дәрежеде өтті", – деді Жандарбек Бекшин Facebook желісінде жариялаған видеоүндеуінде.
Ол QazCovid-in вакцинасынан кейін ауру саны ең аз тіркелетінін атап өтті.
"Бұл Қазақстан Республикасы Білім және ғылым министрлігінің Биологиялық қауіпсіздік мәселелері ғылыми-зерттеу институты әзірлеген ковидке қарсы белсендірілмеген вакцина. Қалалық жұқпалы аурулар ауруханасының емдеу ісі жөніндегі орынбасарының айтуынша, отандық вакцинамен егілгеннен кейін пациенттер басқа вакциналармен салыстырғанда жанама әсерлердің азырақ болғаны байқалған", – деді спикер.
Жандарбек Бекшиннің айтуынша, сондықтан жұқпалы аурулар ауруханасының қызметкерлері қайта вакцинациялау үшін QazCovid-in препаратын таңдаған.
