Жапония Ресеймен Оңтүстік Курилге иелік етуге қатысты бейбіт келісімді талқылауға дайын емес. Бұл туралы елдің премьер-министрі Фумио Кисида мәлімдеді, деп хабарлайды Inbusiness.kz.
“Жапон-Ресей қатынастарындағы жағдай өте күрделі, сондықтан Ресей Федерациясымен бейбітшілік шартын жасасу мүмкіндігін талқылауға әзірге еш негіз жоқ", — деді Фумио Кисида Парламенттегі пікірталас барысында.
Соған қарамастан, Жапония аумақтық мәселені шешу мен бейбітшілік шартын жасасу бағытынан таймағанын, ондай мүмкіндікті жоққа шығармайтынын айтты.
Курил аралдары Екінші дүниежүзілік соғыстан бері екі елдің аумақтық дауына айналған. Себебі бейбітшілік орнағанда Курилдер КСРО еншілігіне көшті, бірақ Токио әлі күнге дейін Кунашир, Шикотан, Итуруп және Хабомай аралдарын өзіне тиесілі деп санайды. Жапония Ресеймен бейбіт келісімге қол жеткізу үшін осы аралдарды қайтаруды талап етеді.
