Алматы әкімі Бақытжан Сағынтаев жаппай тәртіпсіздік кезінде оқ тиіп, қайтыс болған 4 жасар Айкөркем Мелдеханның отбасына барып, көңіл айтты, деп жазды inbusiness.kz.
Қала әкімі оның әкесі Айдос Мелдеханұлы мен анасы Динара Адамовамен кездесті. Алматыда 7 қаңтар болған жаппай тәртіпсіздік кезінде 4 жасар Айкөркем көз жұмды. Ал оның 15 жасар әпкесі Жанель жарақаттанып, жансақтау бөліміне түсті.
"Бақытжан Сағынтаев Жанельдің сауығып кетуін, ата-анасына төзімділік пен шыдамдылық тіледі. Олардың отбасына материалдық көмек көрсетілді. Сонымен қатар көпбалалы отбасыға 3 бөлмелі пәтер беріледі", – деп хабарлады Алматы әкімдігінің баспасөз қызметі.
Еске сала кетсек, Алматыда 7 қаңтарда тәртіпсіздіктер кезінде 4 жасар қыз қаза тапты. Бұл туралы балалар омбудсмені Аружан Саин мәлімдеген еді.
