Электр энергетикасында жасанды интеллект өндірістік қауіпсіздікті арттыру үшін қолданылады. Бұл туралы Энергетика министрі Ерлан Ақкенженов айтты, деп хабарлайды inbusiness.kz сайты.
"Газ саласында жасанды интеллект газ тұтынуды болжау үшін қолданылады. Деректерді беру дәлдігінің көрсеткіші 86 пайызға дейін мәлімделген. Мұнай-газ саласында жасанды интеллект мұнай өнімдерінің айналымын талдау үшін қолданылады. Жоспарлау дәлдігі 85 пайызға дейін құрайды. Электр энергетикасында жасанды интеллект өндірістік қауіпсіздікті арттыру үшін қолданылады. Өндірістік оқиғалар санын 78 пайызға дейін төмендету күтілуде", – деді Ерлан Ақкенженов Үкімет отырысында.
Министрдің сөзінше, күтілетін жиынтық экономикалық әсер жылына шамамен 23 млрд теңгені құрайды.
"Бірінші бағыт – киберқорғау, яғни қауіп-қатерлерді анықтау, технологиялық жүйелерді қорғау және кибершабуылдар кезінде мамандардың іс-қимылын пысықтау. Екінші бағыт – нысандарды физикалық қорғау, оның ішінде ұшқышсыз ұшу аппараттарын анықтау және бейтараптандыру. Бұл міндеттер құрылып жатқан ACR Center – отын-энергетикалық кешеннің киберфизикалық орнықтылығы саласындағы перспективалық әзірлемелер орталығы шеңберінде біріктірілген", – деп түсіндірді Энергетика министрі.
