Түркістан облысының Жетісай ауданында жоғалған әйелді өлтіру дерегі бойынша қозғалған қылмыстық іс бойынша тергеу жұмыстары аяқталуға жақын.
Полицияның мәліметінше, жедел-іздестіру шаралары барысында күдікті ретінде жергілікті тұрғын анықталып, қамауға алынған. Алдын ала болжам бойынша, қылмыс тұрмыстық жанжал негізінде жасалған.
– 28 қаңтарда Жетісай аудандық полиция бөліміне жергілікті тұрғын қызының үйден шығып кеткеннен кейін жоғалып кеткені туралы хабарлаған. Іздестіру шаралары нәтижесінде 8 ақпанда жоғалған әйелдің мәйіті табылды, – делінген полиция хабарламасында.
Тергеу барысында әлеуметтік желілерде тараған, жәбірленушінің бейітін атпен таптау, несиелік қарыз алдыру және ақша бопсалау сынды мәліметтердің шындыққа сәйкес келмейтіні анықталды.
Қазіргі таңда іс бойынша тергеу ҚР Қылмыстық кодексінің 99-бабы 1-бөлігі (Адам өлтіру) бойынша жүргізілуде. Жинақталған іс материалдары осы айдың соңында сотқа жолданады.
Жетісай ауданының прокуроры тергеу амалдары ҚР ҚПК-нің 24-бабына сәйкес жан-жақты, толық және объективті түрде жүргізіліп жатқанын, сондай-ақ істің аудан прокуратурасының бақылауында екенін атап өтті.
