Абылайхан Жүсіпов Әлем кубогының жеңімпазы атанды

70 келі салмақ дәрежесінде сынға түскен отандасымыз финалда Үндістан өкілі Дипакты айқын басымдықпен жеңіп, төрешілердің бірауыз шешімімен (5:0) чемпиондық атақты иеленді.

Абылайхан Жүсіпов турнир жолын сәтті бастап, әр кезеңде сенімді өнер көрсетті. 1/8 финалда Кайан Рейесті жеңді. Бұл қарсылас Әлем кубогының финалисті болғанымен, қазақстандық боксшы кездесуді толық бақылауда ұстап, 5:0 есебімен басым түсті.

Ширек финалда Абылайхан Жүсіпов Шавкатжон Болтаевпен жұдырықтасып, тағы да айқын үстемдік танытып, 5:0 есебімен жеңіске жетті.

Жартылай финалда Азия чемпионы Зейад Ишаишпен кездесіп, жекпе-жектің екінші раундында қарсыластың жарақатына байланысты жеңіске жетті.

Осылайша, Абылайхан Жүсіпов турнир бойы жеңіліссіз өнер көрсетіп, Қытайдағы Әлем кубогының алтын жүлдесін жеңіп алды.