Қазақстанның бірінші, әлемнің 11-ракеткасы Александр Бублик Уимблдон турнирінің үшінші айналымына жолдама алды, деп хабарлайды inbusiness.kz сайты.
Қазақстандық теннисші екінші айналымда рейтингіде 139-орындағы франциялық Кириян Жакемен бетпе-бет келді.
Бұл қос теннисшінің өзара алғашқы кездесуі еді.
Бублик матчты сәтті бастады – 6:3.
Екінші сетте франциялық спортшы 4:1 есебімен алға кеткенімен, бұдан кейін Александр қатарынан бес геймді алды – 6:4.
Үшінші партияда тай-брейкте Бублик таразы басын аудара білді – 7:6 (7:5).
Бір сағат 49 минутқа созылған бәсекеде А.Бублик 15 эйспен бірге 8 брейк-пойнттың тең жартысын өз есебіне жазды. Жаке 8 эйс, 2 брейкпен (9 брейк-пойнт) көзге түсті.
Александр Бублик төртінші айналымға шығу үшін әлемнің 19-ракеткасы, америкалық Фрэнсис Тиафо немесе рейтингіде 100-сатыдағы ұлыбританиялық Ян Хоинскидің қай жеңгенімен таласады.
