Испания чемпионатының 2025/2026 жылғы маусымындағы 28-турда "Реал Мадрид" өз алаңында "Эльче" командасын 4:1 есебімен сенімді жеңіске жетті. Кездесу Мадридтегі "Сантьяго Бернабеу" стадионында өтті.
Алғашқы голды 39-минутта Антонио Рюдигер соқты. 45-минутта Федерико Вальверде есепті еселей түсті. Екінші таймда Дин Хёйсен 66-минутта үшінші голды салды. 85-минутта Мануэль Моран автогол жіберді. Ал матчтың соңғы нүктесін 89-минутта Арда Гүлер қойып, ойын 4:1 есебімен аяқталды.
Мадридтің "Реал" клубы ойында жеңісті ертерек қамтамасыз еткен сәтте, жас түрік футболшысы Арда Гүлер "Бернабеудегі" кешті ерекше әсерге бөлей алды. Бір ғана сәттің ішінде ол жайбарақат өтіп жатқан матчты маусымдағы ең көп талқыланған оқиғалардың біріне айналдырды. Бұл голдың сұлулығы соншалық, стадиондағы жанкүйерлердің бәрі орындарынан тұрып, ұзақ қол соқты.
Матчтың соңғы минуттарында "Эльче" қақпашысы Дитуро қақпасынан алыс шыққанын байқаған Гүлер еш ойланбастан 68,6 метр қашықтықтан сол аяғымен соққы жасады. Доп мінсіз доға сызып, бір рет жерге тиіп секіріп барып, қақпашының үстінен асып, торға дәл түсті. Бұл жай ғана әдемі гол емес, Пушкаш жүлдесін еске түсіретін нағыз шедевр еді.
Футбол тарихында алыстан соғылған керемет голдар аз емес. "Реалдың" жанкүйерлері алыстан дәл соққы жасайтын ойыншылардың өнерін жақсы біледі. Алайда мұндай гол сирек кездеседі. Шамамен 70 метр қашықтықтан жасалған соққыда қателікке орын қалмағандай болды. Мұндай шешім тек стандарттан тыс ойлауға батылы жеткен футболшының қолынан келеді.
Соңғы уақытта мадридтік клубта жас талант Тьяго Питарч көбірек мүмкіндік алып, көпшіліктің назарын өзіне аударып келеді. Сол себепті бұл кездесуде Арда Гүлер қосалқы құрамнан бастауға мәжбүр болды. Көптеген жас ойыншылар үшін мұндай жағдай тоқырауға әкелуі мүмкін еді, бірақ Арда Гүлер үшін бұл өзін дәлелдеуге берілген мүмкіндік болды.
Матчтың соңғы бөлігінде алаңға шыққан ол бірден өзінің шеберлігін көрсетті. Бір ғана ғаламат соққымен Арда Гүлер бүкіл футбол әлемінің назарын өзіне аударды.
