Республика күніне орай Астанада "Келешек мектептері" оқушылары арасында тоғызқұмалақтан қалалық "KELESHEK CUP" турнирі өтті, деп хабарлайды inbusiness.kz сайты.
№106 мектепте ұйымдастырылған жарысқа оқушылар қатысып, ұлттық ойыннан өзара бақ сынады. Турнирдің мақсаты – ұлттық құндылықтарды дәріптеу, балалардың логикалық ойлау қабілетін дамыту және мектептер арасындағы байланысты нығайту.
Жарыс қорытындысы бойынша ұлдар арасында №101 мектеп оқушысы Қуаныш Аян бірінші орын алды. №114 мектептен Бұхар Бексұлтан екінші, №115 мектептен Сайпулла Бүркіт үшінші орынға ие болды.
Қыздар арасында №100 мектеп оқушысы Тәңірбергенова Айнел жеңімпаз атанды. №110 мектептен Сұлтанқызы Дилназ екінші, №112 мектептен Жетпис Ляззат үшінші орын алды.
Турнирді Ы. Алтынсарин атындағы Ұлттық білім академиясы мен Ұлттық ғылыми-практикалық дене тәрбиесі орталығы Астана қаласының Тоғызқұмалақ федерациясымен бірлесіп ұйымдастырды.
