Астаналық "Барыс" сырт алаңдағы ойындар сериясын жалғастыруда. Команда құрамына бір матчтық дисквалификациядан кейін Әлихан Әсетов қайта қосылды. Ол Шанхайда "Дракондарға" қарсы матчта айдын иелерінің қорғаушысы Уайт Калинюкпен төбелесіп қалған болатын.
Матчтың алғашқы бөлігінде қонақтар ойын тізгінін қолға алғанымен, гол соға алмады. Ал "Адмирал" сапынан Либор Шулак штангаға дәл соққы жасап, көзге түсті. Дегенмен есеп ашылмады.
Екінші кезеңде айдын иелері белсенділік танытты. Алайда "Барыс" қорғаныста сенімді ойнап, сирек мүмкіндіктерінің бірін тиімді пайдаланды. Джейк Масси төрт қарсыласын алдап өтіп, Макс Уиллман гол соғуға мүмкіндік алды.
Кейін Никита Тертышный Никита Бояркиннен айласын асырды. Дегенмен кездесудің шешуші шайбасын "4-ке 4" форматында Тайс Томпсон соқты. Бояркин матч барысында 31 сейв жасады. Осылайша елордалық ұжым 2:1 есебімен жеңіске жетті.
13 наурызда "Барыс" "Адмиралға" қарсы тағы бір матч өткізеді.
