Сәрсенбі, 28 қаңтар күні Australian Open турнирінің ширек финалында қазақстандық теннистің көшбасшысы Елена Рыбакина (№5) экс-әлемнің бірінші ракеткасы Ига Швёнтекпен (№2) кездеседі.
Рыбакина ширек финалға бельгиялық Элизе Мертенсті 6:1, 6:3 есебімен жеңіп шықса, Швёнтек аустралиялық Мэддисон Инглисті 6:0, 6:3 нәтижесімен ұтты.
Екі теннисші осы уақытқа дейін 11 рет кездескен. Қазіргі таңда жеке кездесулерде Рыбакина 5:6 есебімен қалып келеді. "Үлкен дулыға" турнирлерінде есеп - 1:1, ал Melbourne корттарындағы Australian Open-де қазақстандық спортшы алда - 1:0.
Рыбакина бұл турнирге жетінші рет қатысып отыр. Оның ең үздік нәтижесі 2023 жылғы финал. Швёнтек Australian Open-де сегізінші мәрте өнер көрсетуде және бұл оған әлі бағынбаған жалғыз "Үлкен дулыға" турнирі.
Соңғы кездесуде жеңіс Рыбакинаға бұйырды. Эр-Риядта өткен WTA Finals-2025 турнирінде жабық хардта қазақстандық теннисші 3:6, 6:1, 6:0 есебімен басым түсті. Ал бүгінгі кездесу Елена үшін жеке кездесулердегі есепті теңестіру үшін тамаша мүмкіндік.
Айта кетейік, Australian Open-2026 турнирінің жалпы жүлде қоры 111,5 миллион аустралиялық долларды (38,7 млрд теңге) құрайды
