Елена Рыбакина (WTA №5) Аустралияның Брисбен қаласында өтіп жатқан WTA 500 санатындағы турнирдің ширек финалына жолдама алды. 1/8 финалда ол испаниялық Паула Бадосаны (WTA №25) екі сетте 6:3, 6:2 есебімен жеңді.
Айта кетерлігі, алғашқы сетте қазақстандық теннисші 0:2 есебімен ұтылып жатқанымен, камбэк жасап, партияны өз пайдасына шешті. Кездесу 1 сағат 26 минутқа созылды. Рыбакина 3 эйс орындап, қос қателікке жол берген жоқ. Ал, Бадоса 6 эйс жасап, 9 қос қателік жіберді.
Жартылай финалға шығу үшін Рыбакина әлемдік рейтингте 20-орында тұрған чехиялық Каролина Муховамен кездеседі.
Мухова 1/8 финалда сенсация жасап, ресейлік Екатерина Александрованы (№10) 6:4, 7:5 есебімен жарыстан шығарды. Брисбендегі турнир 4-11 қаңтар аралығында өтуде. Жарыстың жалпы жүлде қоры 1,2 миллион АҚШ долларын (613,4 млн теңге) құрайды.
