Атом энергиясы жөніндегі агенттік төрағасы Алмасадам Сәтқалиевтің айтуынша, алдын ала іріктеу қорытындысы бойынша тізімге енгізілген қатысушылардың барлығында бірегей технологиялар бар.
Дегенмен ең жақсы ұсыныстар Қытай мен Ресей компанияларынан түскен.
"Қытаймен ядролық саладағы ынтымақтастық туралы жеке келісімге қол қою жоспарланып жатыр. Тағы бір АЭС салу үшін Қытай технологияларын Қазақстанда көргіміз келеді. Объективті түрде айтсақ, әлемде ядролық циклді өз бетімен игере алатын елдер көп емес. Әрине, Қытай барлық қажетті технологиялары, өнеркәсіптік базасы бар елдердің бірі. Біздің келесі басты басымдығымыз – Қытаймен ынтымақтастық", – деді Алмасадам Сәтқалиев.
Сондай-ақ, ол Қытай тарапымен тиісті келіссөздер жүргізілетінін айтты.
"Келісімдер өте жоғары деңгейде өтті. Біз Қытай тәжірибесін қабылдауға мүдделіміз. Олар құрылысты тез әрі сапалы жүргізе алады. Біз бұл бағытта жұмысты бастап кеттік. Агенттік те тиімді консорциумдар құруы керек", – деді ол.
Бұған дейін Қазақстандағы бірінші АЭС құрылысын ресейлік "Росатом" жүргізетіні хабарланған еді.
