Аудиториясы өте ауқымды халықаралық блогерлер еліміз туралы контент түсіруге қазақ баласынан шақырту алған, деп жазады inbusiness.kz сайты.
Анығын айтқанда, олар "Туризм саласының үздігі" марапатының және "Әлемнің үздік тревел-блогері" номинациясы бойынша халықаралық WIBA Awards 2026 сыйлығының иегері Дастан Мұхамедрахымның (bydastann) шақыртуымен Алматыға аялдаған.
Шетелдік қонақтардың арасында YouTube-те 20 миллионнан астам аудиториясы бар иорданиялық режиссер-деректі фильмдер түсіруші Джо Хаттаб (joe_hattab) және TikTok пен Instagram-да көпмиллиондық қауымдастықты қамтитын америкалық тревел-блогер Джошуа Платильеро (megaamerican) айрықша көрінеді.
Сапар аясында блогерлер еліміздің туристік мүмкіндіктеріне арналған бірлескен түсірілімдер жүргізбек.
– Біз Қазақстанның сұлулығын көрсетуді жоспарлап отырмыз. Керемет контент күтіңіздер, – деді Дастан Мұхамедрахым.
Шынын айту керек, мұндай ауқымды инфлюенсерлердің елге келуі қазақстандық туризмді сөзсіз дамытады және танымалдығын арттыра түседі.
