Иран президенті Масуд Пезешкиан ШЫҰ саммитіне қатысып, Қырғызстаннан елге қайтып келе жатқанда, ұшағы Рашт халықаралық әуежайына қонды. Бұл туралы бірнеше шетелдік БАҚ жазды, деп хабарлайды inbusiness.kz сайты 24.kg агенттігіне сілтеме жасап.
Әзербайжанның Axar.az және TodayPress басылымдарының мәліметінше, Иран президенті Масуд Пезешкиан мінген ұшақ Бішкектен елге қайтып келе жатқан жолда Рашт қаласына қонған.
Басылымдар Израильдің Channel 12 арнасына сілтеме жасап, ұшақтың бұл әуежайға шұғыл жағдайда қонғанын хабарлады. Ашық дереккөздерде президенттік IRAN02 қоңырау белгісі бар ұшақтың 1 қыркүйек күні кешке Рашт әуежайына қонғаны расталады. Алайда материал жарияланған сәтке дейін Иран президентінің әкімшілігі ұшақ бағытының өзгеру себебіне қатысты ресми түсініктеме берген жоқ.
TodayPress басылымының жазуынша, 1 қыркүйек күні кешке Тегеранның шығыс бөлігінде әуе шабуылына қарсы қорғаныс жүйелері іске қосылған. Басылымның болжамынша, осы жағдайға байланысты президент ұшағының бағыты өзгеруі мүмкін.
Иранның мемлекеттік ақпарат агенттігі ұшақтың Раштқа қонуын қысқа аялдама деп атады. Агенттіктің хабарлауынша, Гилан провинциясының губернаторы ұшақтың қысқа уақытқа тоқтағанын пайдаланып, президентке өңірдегі халықты маңызды тауарлармен қамтамасыз ету жағдайы туралы баяндаған.
Масуд Пезешкиан 31 тамыз бен 1 қыркүйек аралығында Қырғызстанда жұмыс сапарымен болды. Ол Бішкекте Шанхай ынтымақтастық ұйымының саммитіне қатысып, шетелдік көшбасшылармен бірқатар кездесу өткізді. Қырғызстан тарапы Пезешкианның ШЫҰ Мемлекет басшылары кеңесінің отырысына, "ШЫҰ плюс" форматына және VI Дүниежүзілік көшпенділер ойындарының ашылу салтанатына қатысу үшін келгенін ресми хабарлаған болатын. Пезешкиан Бішкекте Ресей президенті Владимир Путинмен де жүздесті.
