Қазіргі уақытта 150 мыңнан аса шатыр Газа секторының сыртында жеткізуге дайын тұр, деп хабарлайды inbusiness.kz сайты.
БҰҰ гуманитарлық ұйымының басшысы маңызды мәлімдеме жасады.
– Бұдан былай ешқандай кідіріс болмауы керек. Біреуін ғана емес, барлық өткізу бекетін ашыңыздар, – деді БҰҰ Бас хатшысының гуманитарлық мәселелер жөніндегі орынбасары, Төтенше көмек көрсету жөніндегі үйлестірушісі Том Флетчер.
Ол үкіметтік емес ұйымдардың маңызды серіктестеріне жұмыс істеуге мүмкіндік беруді, сауда орындарының қалыпты қызметін қалпына келтіруді және Газа халқына қарсы ұжымдық жазалау шараларын тоқтатуды талап етті.
БҰҰ-ның гуманитарлық ұйымдары бірнеше айдан бері Газа секторына қысқы маусымға қажетті заттарды жеткізу мәселесін көтеріп келеді. Десе де, Израильдегі сайлауға дейін бұл бағыттағы жұмыстар қиындайтыны бірнеше рет айтылған. Қазір гуманитарлық қызметкерлерге жаңа үкімет жасақталғанша күту қажеттігі ескертілген.
– Халықаралық гуманитарлық құқыққа қатысты кімде-кімнің күмәні болса, мұны ақтауға болмайтынын түсінуі керек, – деді Флетчер.
Бірнеше апта бұрын БҰҰ-ның гуманитарлық ұйымдары қажетті заттарды жеткізудің нақты жоспарын ұсынған болатын.
Өткен демалыс күндері нөсер жаңбыр салдарынан Газа секторының бірнеше аумағын су басып, бірнеше адам қаза тапқаны хабарланды.
Қазір гуманитарлық ұйымдар мен БҰҰ-ға мүше мемлекеттер сатып алған 150 мыңнан астам шатыр Газа секторының сыртында жеткізуге дайын тұр.
– Газаға қажетті заттар мен жабдықтарды жеткілікті көлемде тасымалдау үшін гуманитарлық қаржыландыру мен Израильдің рұқсаты шұғыл қажет, – делінген мәлімдемеде.
