Хаби Алонсо баспасөз мәслихатында Алматының тым шалғай орналасуы ойын нәтижесіне еш кедергі келтірмейтінін жеткізді, деп хабарлайды inbusiness.kz сайты.
– Ертең – Чемпиондар лигасы матчы. Қарсылас кім, қайда ойнайтынымыз маңызды емес, біз жеңіске жетсек дейміз. Маңыздысы – жақсы бастау. Біз өз алаңымызда жеңіске жеттік, енді сырт алаңда да ұпай жинауды жалғастырғымыз келеді, – деді Хаби Алонсо.
Бас бапкер "ұзақ сапар мықты команда үшін қиындық тудырмауы тиіс" деген ойын да ашық жеткізді.
– Бейімделе білу керек. Әдеттегі жоспарды сәл өзгерттік, бірақ футболда ең ақылдысы – жақсырақ бейімделген команда. Бұл – жай ғана тағы бір ойын, ал қашықтық кедергі де, сылтау да болмауы тиіс. Біз жеңіспен бастадық, әрі қарай да солай жалғастырғымыз келеді. Бұл – олардың алғашқы маусымы. Жақсы команда, бәрін дұрыс жасайды және бізге талап қоя біледі, – деп сөзін нақтылады ол.
Сонымен қатар, "Реал Мадридтің" жартылай қорғаушысы Федерико Вальверде де әуежайдағы жанкүйерлердің күтіп алу сәтін айтып берді.
– Алматыда "Реал Мадридтің" жанкүйерлері көп екені қуантты. Қазақстаннан қанша шалғай орналасса да, бұл елдегі жанкүйерлердің болуы – футбол үшін керемет көрініс. Түн ортасында келсек те, жергілікті тұрғындар көп жиналды. Бірақ таңғалдым деп айта алмаймын. Себебі, біз үшін қалыпты жағдай, – деді ол.
