Алматылық "Қайрат" бүгін Қазақстан Премьер-лигасының (ҚПЛ) 24-туры аясында өз алаңында талдықорғандық "Жетісуды" 5:0 есебімен ойсырата жеңді. Кездесудің тағдыры іс жүзінде алғашқы таймда-ақ шешіліп қойған еді. Алаң иелері қарсыластың қақпасына төрт бірдей жауапсыз гол соқты.
9-минутта 17 жастағы шабуылшы Дастан Сәтпаев пенальтиден есеп ашты. Араға 11 минут салып португалиялық Жоржиньо есепті еселесе, 35-минутта ол дубль авторы атанып, есепті ірі көрсеткішке жеткізді. 43-минутта бразилиялық Эдмилсон Сантос соққан голдың арқасында есеп 4:0 болды. 90-минутта Азамат Тұяқбаев матчтың нүктесін қойды – 5:0.
Бұл жеңістен кейін Рафаэль Уразбахтиннің шәкірттері 55 ұпайға ие болып, турнирлік кестеде 53 ұпайы бар "Астананы" басып озды да, көш басына шықты. Ал Самат Смақов жаттықтыратын "Жетісу" 21 ұпайымен 11-орынға сырғыды.
