Дәстүрлі қазақ өнімі – талқан Чикагодағы кофеханада сатыла бастаған, деп жазады inbusiness.kz сайты.
Талқаннан бөлек, кофехананың мәзірінде тары, науат, сүзбе және басқа да бірқатар қазақ тағамы бар.
– Мәзірде қолданылған өнімдердің бірі – талқан, яғни қуырылып, ұнтақталған дәнді дақылдардан жасалатын дәстүрлі өнім. Ерекше назар аударатын жайт – талқанға АҚШ-тың Ұлттық аэронавтика және ғарыш кеңістігін зерттеу басқармасы (NASA) тарапынан қызығушылықтың болуы. Өнім ғарышкерлердің тамақтану рационына енгізілуі мүмкін нұсқалардың бірі ретінде қарастырылған. Бұл қызығушылық оның табиғи құрамы, жоғары тағамдық құндылығы және жоғары жүктеме мен шектеулі ресурстар жағдайында қолданылатын функционалдық тамақтану талаптарына сай келуімен түсіндірілді, – делінген ресми хабарламада.
QazTrade компаниясының экспортты дамыту жөніндегі басқарушы директоры Айнұр Әмірбекованың сөзінше, өнімдерге деген қызығушылық күн санап артып барады.
– Бүгінгі уақытта халықаралық нарықтарда түсінікті құрамы, тарихы және мәдени контексті бар өнімдерге сұраныс артып келеді. Талқан, осы мағынада, саналы және функционалды тамақтанудың жаһандық трендіне жақсы сәйкес келеді. Шетелдік тұтынушылар үшін дәмдік сипаттамалар ғана емес, өнімнің шығу тегі, оның дәстүрлері мен қолдану тәсілі де маңызды, – деді ол.
