Қазақстандық жүзгіштер АҚШ-тың Гринсборо қаласында өткен халықаралық турнирде табысты өнер көрсетіп, жалпы саны 17 медаль жеңіп алды, деп хабарлайды inbusiness.kz сайты.
Оның ішінде 13 алтын, 2 күміс және 2 қола жүлде бар.
София Абубакирова 50 метрге баттерфляй әдісімен жүзуде алтын, 50 метрге шалқалап жүзуде қола медаль иеленді. Сонымен қатар ол 4×50 метр және 4×100 метрге еркін стильдегі, сондай-ақ 4×50 метрге аралас эстафетада чемпион атанды.
Максим Сказобцов 100 метрге баттерфляй әдісімен жүзуде топ жарды. Сондай-ақ 200 метрге баттерфляйда күміс, 50 метрге баттерфляйда қола жүлдеге ие болды. Бұдан бөлек, ол 4×50 метр және 4×100 метрге еркін стильдегі, сондай-ақ 4×100 метрге аралас эстафетада алтын медаль жеңіп алды.
Егор Попов 100 метрге еркін стильде жүзуден алтын медаль жеңіп алды. Сонымен қатар 4×50 метрге еркін стильдегі және 4×50 метрге аралас эстафетада жеңімпаз атанды.
Ришат Жұмағұлов 50 метрге баттерфляй әдісімен жүзуде күміс жүлдеге қол жеткізді. Сондай-ақ ол 4×50 метрге еркін стильдегі және 4×50 метрге аралас эстафетада алтын медаль иеленді.
