Қаржы нарығын реттеу және дамыту агенттігі тұрғын үй құрылыс жинақ жүйесіне екінші деңгейлі банктердің қатысуын қарастыратын заңнамалық түзетулер топтамасын дайындағанын хабарлады, деп жазады inbusiness.kz сайты.
Бұл банктегі тұрғын үй заемдарының жылдық мөлшерлемесі 3,5%-дан 5%-ға дейін өзгереді.
"Тұрғын үй құрылыс жинақ жүйесіне – бұл салымшылардың қаражатын тұрғын үй құрылыс жинағына тарту, мемлекет сыйақысын есептеу және кейін ипотекалық тұрғын үй заемдарын беру жүйесі. Бүгінгі таңда "Отбасы банк" бойынша тұрғын үй заемдарына сыйақы мөлшерлемесі жылына 3,5%-дан 5%-ға дейін. Сонымен қатар ипотекалық несиелеу нарығындағы бәсекелестікті арттыру және ТҚЖЖ-ны одан әрі дамыту мақсатында Агенттік заңнамалық түзетулер дайындады. Онда екінші деңгейлі банктерге тұрғын үй құрылыс жинақ жүйесіне салымшылардың қаражатын тартуға және тұрғын үй заемдарын беруге құқық беру қарастырылған", – делінген агенттік таратқан хабарламада.
Агенттік өкілдерінің айтуынша, заңнамалық өзгерістер "ҚР кейбір заңнамалық актілеріне қаржы нарығын реттеу және дамыту мәселелері бойынша өзгерістер мен толықтырулар енгізу туралы" заң жобасына енгізілген. Қазір ол мемлекеттік органдармен келісу сатысында және 2025 жылғы тамызда Мәжіліске енгізілуі жоспарланып отыр.
