Қазақстан Республикасы Премьер-министрінің орынбасары – Ұлттық экономика министрі Серік Жұманғарин Экономикалық ынтымақтастық ұйымының (ЭЫҰ) Бас хатшысы Асад Маджид Ханмен ресми кездесу өткізді, деп жазады inbusiness.kz сайты.
Тараптар сауда байланыстарын арттыру, жаңа көлік дәліздерін дамыту және аймақ экономикасындағы цифрлық трансформация мәселелерін талқылады.
Кездесу барысында ЭЫҰ-ға мүше мемлекеттер Қазақстанның маңызды сауда әріптестері екені атап өтілді. 2025 жылдың қорытындысы бойынша ЭЫҰ мемлекеттерімен өзара сауда көлемі өткен жылмен салыстырғанда 11,5%-ға артып, 15 млрд доллардан асты. Қазақстандық экспорт негізінен мұнай, мыс, бидай, күнбағыс майы, ұн және мұнай өнімдерінен тұрады.
Серік Жұманғарин Қазақстанның ЭЫҰ елдерімен өзара іс-қимылы соңғы жылдары тұрақты оң динамиканы көрсетіп отырғанын, оны арттыруда айтарлықтай әлеует бар екенін атап өтті. Қазақстанда шамамен 1 млрд доллар көлемінде экспорттық әлеуеті жоғары өңдеуші өнеркәсіптің 137-ге жуық тауар позициясы бар.
Әлемдік экономиканың негізгі драйверлерінің бірі ретінде қарастырылатын электрондық сауданы дамытуға ерекше көңіл бөлінуде. ЭЫҰ елдерінің күш-жігерін шоғырландыру тұрақты және өзара тиімді сауда кеңістігін қалыптастыруға мүмкіндік беретіні атап өтілді.
Тараптар ЭЫҰ кеңістігіндегі экономикалық байланыстың негізі саналатын көлік-логистикалық ынтымақтастық мәселесін егжей-тегжейлі талқылады. 2026 жылы Қазақстан ЭЫҰ-ның көлік секторына төрағалық етеді.
Вице-премьер "Солтүстік – Оңтүстік" дәлізінің Ауғанстан мен Пәкістанға жол ашатынын және оның басым маңызға ие екенін атап өтті.
Сондай-ақ ол биыл Қазақстан мен Пәкістан арасында Қытай арқылы (Қарақорым тас жолы арқылы) алғашқы жүктер жеткізіле бастағанын хабарлады.
Аталған бағыттардың дамуы, көбінің теңізге шығу мүмкіндігі жоқ болғандықтан, Орталық Азия елдері үшін стратегиялық маңызға ие. Олар арқылы халықаралық теңіз порттарына қол жеткізуге болады.
Кездесу барысында ЭЫҰ Бас хатшысы Асад Маджид Хан Қазақстан Үкіметін Өңірлік экологиялық саммиттің сәтті өтуімен құттықтап, еліміздің ұйымдағы жетекші рөлін атап өтті.
"Қазақстан – ЭЫҰ-ның айрықша әріптесі. Біз Қазақстанды өңірлік хаб және ЭЫҰ елдері мен Еуропа арасындағы көпір ретінде қарастырамыз", – деді ол.
Оның айтуынша, қазіргі геосаяси жағдайда аймақтар мен құрлықтар арасындағы байланыстың маңызы арта түсуде. Осыған байланысты ЭЫҰ қазіргі және перспективалық маршруттардың картасын дайындау, сондай-ақ Каспий теңізінің акваториясындағы инфрақұрылымдық жобаларды жүзеге асыру сияқты көлік дәліздерін дамыту жұмыстарын жүргізуде.
Тараптар сондай-ақ Еуразиялық экономикалық одақ пен ЭЫҰ арасындағы интеграциялық процестерді ұштастыру мәселесін, соның ішінде Пәкістанмен еркін сауда аймағы туралы келісім жасасу перспективаларын талқылады.
Қорытындылай келе, Серік Жұманғарин ЭЫҰ елдерінің үйлесімді іс-қимылының маңыздылығын атап өтті. Ол Қазақстанның ұзақ мерзімді және өзара тиімді әріптестік үшін жағдай жасай отырып, ірі экономикалық одақтар арасындағы байланыстырушы буын болуға дайын екенін мәлімдеді.
